اعتراافات بنت خطيرررررررررررة/للبنات/

بكتب لكم قصتي واتمنى انكم تستفيدون منها
انا غاده..عمري 22 سنه
ادرس بجامعه الملك سعود
من عايله مقتدره ماديا ومعروفين اجتماعيا والحمدلله
بابا شخصيه مشهوره وانا بنته الدلوعه واللي مايرفض لها طلب بس مااشوفه كثير دايم مشغول!
ماما جامعيه ومثقفه وكل من شافها يحبها بس علاقتي فيها شوي سطحيه لاني مو مره معاها==>وش اسوي هي ماتقعد معاي
انا اكبر وحده من اخواني
انسانه حلوه (بشهاده الكل) مو بس بالشكل حتى بالطباع
من كنت بأول ثنوي وانا اكلم شباب (يعني تقريبا قبل 5 سنوات) وتقريبا كلمت جميع الالوان والاشكال والاحجام
امراء ورجال اعمال وعيال وزراء وضباط وفنانين وشعراء وبدو وشباب اصغر مني وشيبان وعيال النسيم وكويتين وقطريين واماراتين ومصريين ولبنانيين وسوريين وهنود حتى الملتزمين ماخليتهم كنت بأسلوبي المميز وشكلي الحلو اقدر اجذب اي احد بس اهم شي احطه براسي واسحبه لين عندي وكنت مبسوطه من هالشي اي واحد احطه براسي اجيبه احيانا يصير فيه تحديات بيني وبين البنات وكنت دايم اكسب هالتحديات (لدرجه ان بعض البنات مايخلون اخوياهم يكلموني يخافون يشبكون معاي ويسحبون عليهم)
وتبون الصراحه 95% من الشباب تفكيره بالجنس بس و4% ضحك واستهبال ووناسه و1% يحبون من جد (طبعا هذا الكلام عن تجربه وخبره!) وانا كنت انبسط مع النوع الثاني كثير اما النوع الاول فكان مره يقرفني ويحوم كبدي والنوع الاخير مايعجبني ابد لاني مو راعيه حب وخرابيط بس كنت اسلك مع كثير واعطيهم على جوهم..
طبعا انا من البدايه كنت حاطه لنفسي حدود مااتعداها يعني مااركب مع اي واحد بالسياره ومااروح حفلات ولابيوت ولامطاعم ولافيه بوسات وحركات قلة حياء (مهما كان انا للحين ماكفرت وفيني خير وبنت ناس محترمين واعرف العيب) يعني كانت كل شوفاتي من بعيد لبعيد تكون في مكان عام او وكل واحد بسيارته (وطبعا دايم استاجر سيارات لان سيارتي باسم بابا)
على الاغلب كنت اكذب عليهم بكل شي حتى بالاسم بس مافي ولا واحد فيهم كان يقدر يكذب علي لان معارفي كثير ومايقصرون
يعني كنت اكلم تسليه واقضي وقت فراغي (بس كنت اقضيه بشي مايفيد للأسف)
اكيد بتسألون على هالسنين كلها وعلى كثر اللي كلمتيهم مافي ولاواحد حبيتيه؟
بصارحكم وبقول من هالآلآف اللي كلمتهم بس في واحد حبيته انا نفسي ماادري كيف بس "القلب ومايهوى" من جد حبيته بكل مافيني لا مو بس حبيته كنت مجنونه فيه من اسمع اسمه يفز قلبي وصرت انادي كل الناس باسمه بس الدنيا ماجمعت الا وفرقت والله ماكتب نصيب
والباقين كنت على الاغلب اسحب عليهم بعد فتره لاني اكون طفشت منهم وبعضهم بالعكس مررره اعزهم ويعزوني كانهم اخواني يعني فيه كم واحد لما اتضايق على طول اكلمهم لانهم يسمعوني ويفهموني يعني مثل مايقولون "الصديق وقت الضيق"
طبعا انا ماكنت اكلمهم من جوالي العام اللي باسم بابا لويموتون كنت اكلمهم كلهم من جوالين سوا بدون اسم وعندي واحد موبايلي (واحب اقول للاتصالات نصيحه افصلوا كل الجوالات السوا لانها على الاغلب لبنات عشان يكلمون فيها وانتم عارفين بهالشي صدقوني بتاخذون ذنوبهم والكلام لموبايلي بعد) على فكره عندي كثير معارف بالاتصالات اذا تبون اي خدمه انا جاهزه
المهم بعد هالسنين كلها قعدت مره افكره انا وش استفدت هالحين من هالمكالمات والطلعات الا رب غضبان علي وبعدين كل اللي اكلمهم حتى لوكنت اعزهم ويعزوني ماراح ينفعوني يوم القيامه وبعدين انا دايم احس بضيقه وغلقه لان الشي اللي انا قاعده اسويه غلط!

وبهذاك اليوم قررت اني اغير حياتي وابدا حياه جديده وافتح صفحه بيضاء بالدنيا اخذت شرايحي وكسرتها حتى الاجهزه ذبيتها واخذت على نفسي وعد اني مارجع اكلم ابد وتركت صديقات السوء (صدقوني ياناس ترى اكثر شي ياثر على الواحد اصحابه ودايم تذكروا ان "الصاحب ساحب" فاختروا الناس الطيبين عشان ماتندمون)
وصاحبت بنات عسل وطيبات وركزت اهتماماتي على نفسي واهلي ودراستي
والحين الحمدلله انا مرتااااااااااااااااحه وصرت احافظ على صلاتي بعد ماكنت اتركها وصرت اصوم اي صيام تطوع وانام وانا متطمنه ومرضيه رب العالمين صدقوني اني ندمت على كل المكالمات والحركات اللي قبل والله يغفرلي كل اللي كنت اسويه وهو الغفور الرحيم (قولوا آمين) يعني من جد الحمدلله ان ربي هداني قبل مااموت على هالمعاصي والا تصير مصيبه اكون فيها عظه وعبره لغيري
يلا يابنات والله مااحد يدري متى يومه وانا عارفه انكم مو مرتاحين وقاعدين على اعصابكم وعارفين انكم تسون شي غلط (اي وحده تقول انها مرتاحه بالمكالمات تراها انسانه كذااااااابه مع احترامي لها) ارجعوا للطريق الصح صدقوني بترتاحون وبتدعون لي وتذكرون قول الله تعالىقل ياعبادي الذين أسرفوا على أنفسهم لاتقنطوا من رحمة الله إن الله يغفر الذنوب جميعا إنه هو الغفور الرحيم)
واللي تقول اذا تركت المكالمات وش اسوي طفش وزهق اقولها تذكري قول الرسول صلى الله عليه وسلممن ترك شيئا لله عوضه الله خيرا منه) واضيف قائله((يضم الماسن والدردشه وسوالف مع شباب))
واللي تقول أخاف يفضحني والا يسوي فيني شي اقولها "إن الله سترك وانتي تعصيه فكيف يفضحك وانتي تطيعيه" بس عليكم بالدعاء قال تعالىوإذا سألك عبادي عني فإني قريب أجيب دعوة الداع إذا دعان)
والله يثبتنا ويوفق الجميع..))

يسلموووو خيو موضوووع مفيد

يسلمووووووووووووووووووووووو

مررررررررررسي

تقبلي مروري اختي

ومشكوورة ع الموضوع المميز